WATENDAJI WA DAR ES SALAAM WAPIGWA MSASA KUTOA MSAADA WA KISHERIA KWA WANANCHI

  Mtendaji wa Mtaa wa Kiungani Kata ya Kurasini Manispaa ya Temeke, Theophilda Christopher, akitoa maoni yake  wakati wa mafunzo ya siku moja ya kuwajengea uwezo watendaji wa Mitaa na Kata juu ya kutoa msaada wa kisheria kwa wananchi.  Mafunzo hayo yaliyofanyika jijini Dar es Salaam jana, yanaendeshwa na Mradi wa Maboresho wa Sekta ya Sheria chini na  Chama cha Wanasheria wa Tanzania Bara (TLS). 

  Wakili kutoka Chama cha wanasheria Tanzania Bara (TLS) Steven Madulu, akitoa somo kwa watendaji wa Mitaa na Kata jana mjini Dar es salaam juu ya utoaji wa msaada wa kisheria kwa wananchi wenye shida mbalimbali na hawawezi kumudu gharama kuajiri wakili. Watendaji hao wanatoka wilaya za Temeke na Kinondoni.

  Wakili kutoka Chama cha wanasheria Tanzania Bara (TLS) John Seka akiwafundisha watendaji wa Mitaa na Kata jana mjini Dar es salaam juu ya utoaji wa msaada wa kisheria kwa wananchi wenye shida mbalimbali na hawawezi kumudu gharama kuajiri wakili. Watendaji hao wanatoka wilaya za Temeke na Kinondoni.

Baadhi ya Watendaji Mtaa na Kata kutoka wilaya za Kinondoni na Temeke mkoani Dar es salaam wakisikiliza kwa makini jana mjini Dar es salaam mafunzo ya kutoa msaada wa kisheria kwa wananchi kwenye maeneo yao. Mafunzo hayo yanaendesha na Mradi wa Maboresho wa Sekta ya Sheria chini Chama cha Wanasheria wa Tanzania Bara(TLS).

 

******************************

 

Na Tiganya Vincent – MAELEZO-Dar es salaam

CHAMA cha Wanasheria  Tanzania Bara (TLS) kimeendesha mafunzo maalum ya siku moja ya kuwawezesha Watendaji wa Mitaa, Kata wa Wilaya za Temeke na Kinondoni jinsi ya kutoa msaada wa kisheria kwa jamii inayowazunguma katika mitaa.

Kauli hiyo ilitolewa jana jijini Dar es salaa na Mratibu wa Mradi wa Maboresho wa Sekta ya Sheria kutoka TLS, Maria Matui, wakati akizungumza na waandishi wa habari baada ya mafunzo hayo.

Alisema kuwa lengo la mafunzo hayo ni kuwawezesha watendaji hao kufikisha ujumbe wa msaada wa kisheria kwa wananchi ili waweze kutambua wapi wanaweza kupata huduma hiyo bila malipo.

Aidha Matui aliongeza kuwa mafunzo hayo yanawashirikisha watendaji 90 kutoka maeneo mbalimbali ya Wilaya za Kinondoni na Temeke ili kuwajengea uwezo wa kuwaelimisha wananchi jinsi ya kupata msaada wa kisheria ili nao pia waweze kutoa msaada huo kwa wananchi pindi mwananchi anapohitaji.

Alisema kuwa chini ya mafunzo hayo wananchi watapata ufahamu juu ya vigezo vinavyostahili mtu kupata msaada wa kisheria bila malipo kutoa TLS na pia kujua siku ya msaada wa kisheria kitaifa .

Matui alisema kuwa mwananchi wamekuwa hawapati huduma za msaada wa kisheria kwa sababu ya kushindwa kumudu gharama za mawakili na wakati mwingine baadhi ya maeneo hakuna mawakili hali inayowafanya kukosa haki zao za msingi.

Alisema mafunzo hayo yanakusudia kuhakikisha kuwa msaada wa kisheria unafika katika ngazi ya chini ya jamii kwa kuwawezesha wasaidizi wa kisheria kuweza kutambilika .

Chama cha Wanasheria Tanzania Bara(TLS) kinaendesha mafunzo hayo chini Programu ya Maboresho ya Sekta ya Sheria (LSRP) wa Wizara ya Katiba na Sheria.Picha na Tiganya Vincent-MAELEZO-Dar es salaam