BREAKING NEWS: MPENDAZOE KORTINI

JESHI la polisi mkoa wa Shinyanga leo asubuhi limemkamata na kumhoji kwa muda saa kadhaa kada wa Chadema, Fred Mpendazoe kufuatia tuhuma za kutishia kwa bastola pamoja na kumfanyia shambulizi katibu wa UVCCM kata ya Maganzo, Abdulkadiri Mohammed mwaka jana.

Kukamatwa kwa mpendazoe kumekuja siku tatu akiwa katika ziara yake ya kwanza mkoani humo tokea alipokihama chama cha Mapinduzi (CCM) na kuachia ubunge kwa kujiunga na chama cha CCJ na baadaye kukimbilia Chadema.

Mpendazoe amekamatwa wakati akiwa katika ziara ya Kichama kuimarisha Chadema katika mkoa wa Shinyanga ambapo tokea majuzi amekuwa akifanya mikutano kadhaa ya hadhara katika maeneo ya Maganzo, Kishapu, Mhunze na Shinyanga mjini.

Kukamatwa kwake kunatokana na kosa ambalo alidaiwa kutenda Oktoba mwaka jana la kumtishia bastora na kumshambulia kwa maneno Katibu wa UVCCM, kesi ambayo Mpendazoe alidai kuwa ilikwisha siku nyingi.

Kamanda wa polisi mkoa wa Shinyanga Diwani Athuman akielezea uamuzi wa jeshi lake alisema Mpendazoe alikamatwa kwa ajili ya kuhijiwa leo kwa tuhuma zilizokuwa zikimkabili na kisha kuachiwa huru.

“Tulikuwa tukimtafuta toka mwaka jana mwezi Oktoba, lakini kutokana na makazi yake kuwa jijini Dar tulitumia nafasi hii baada ya kuja hapa Shinyanga kumtia mbaloni kwa suala lake, na baada ya kumuhoji tulimwachia” Alisema Kamanda Athuman na kuongeza kuwa kesi hiyo ilitokana na masuala ya siasa.

Kamanda huyo akifafanua zaidi alieleza kuwa katika mahojiano yao na Mpendazoe alidai kesi hiyo imeshafutwa ambapo Kamanda wa polisi alisema kuwa kwa sasa wapo katika jitihada za kumtafuta mlalamikaji huyo ili aweze kuthibitisha kama kweli walifikia hatua ya kufuta kesi hiyo ili

waweze kulifikisha suala hilo kwenye ofisi ya mwanasheria mkuu wa serikali kwa ajili ya hatua zaidi.

“Siku za kariburi sisi polisi tulisikia wameelewana, lakini habari hizo hazikuwa zimetufikia rasmi hapo ofisini ndio tukaamua kumwita na yeye akasema ni kweli, lakini hatutaishia hapo ni lazima pia tumwite mlalamikaji ili atuthibitishie ili tuweze kulifikisha kwa mwanasheria kwa hatua zaidi, yeye atajua kama kuna kesi ya kujibu au la” Alisema.

Hata hivyo akizungumzia kukamatwa kwake, Mpendazoe alielezea kusikitishwa na kitendo hicho cha Polisi kumkamata kwa kesi ambayo anatambua kuwa ilikwisha malizika kutokana na yeye na mlalamikaji kufikia makubaliano.

“Mimi pamoja na mlalamikaji tulikubaliana kumaliza jambo hili nje ya hamakama, na tukaandika makubaliano yetu na mkuu wa upelelezi wa mkoa (RCO) toka mwezi Machi mwaka huu, sasa nashanga leo ninakamatwa,” alifafanua Mpendazoe.

Na Frederick M. Katulanda