SIMBA, YANGA ZAKABIDHIWA UWANJA WA TAIFA

 

Na Khadija Mngwai
UWANJA wa Uhuru wa jijini Dar es Salaam, unatarajia kufungwa rasmi Aprili Mosi mwaka huu ili kupisha marekebisho kadhaa ikiwemo sehemu ya majukwaa.

Kutokana na kufungwa kwa uwanja huo, timu ambazo zimekuwa zikiutumia zitahamia kwenye Dimba la Taifa, ambapo baadhi ni Simba, Yanga na Azam.

Ofisa Habari wa Shirikisho la Soka Tanzania (TFF), Boniface Wambura, aliliambia Championi Ijumaa kuwa, wamepokea barua rasmi kutoka wizarani juu ya matengenezo ya uwanja huo, hivyo timu nne za Ligi Kuu ya Bara zinazoutumia zitamalizia mechi zake kwenye Uwanja wa Taifa.

“Uwanja wa Uhuru unatarajiwa kufungwa Aprili Mosi, tumeandaa utaratibu wa kuzihamisha mechi nne ambazo zilitakiwa kufanyika wakati huo,” alisema Wambura.

Wambura amefafanua kuwa, TFF imekubaliana na serikali juu ya mabadiliko hayo, hivyo watazifahamisha timu zote kuhusiana na kuhamisha mechi zao zinazofuatia baada ya Uwanja wa Uhuru kufungwa.

Timu ambazo zilitarajia kumalizia mechi zake za mwisho ni kati ya Simba na Majimaji, Azam na Polisi Tanzania, JKT Ruvu na Polisi pamoja na African Lyon na Yanga.