JULIO AONDOKA NA SAMATTA, KADO

 

Na Mwandishi Wetu
Kocha mkuu wa timu ya Taifa ya Vijana chini ya miaka 23, Manyara Stars, Jamhuri Kihwelo ‘Julio’ amesema amefurahishwa na hatua ya kuwapata kikosini, kipa Shaaban Kado na mshambuliaji Mbwana Samatta.

Akizungumza na Championi Ijumaa, Julio alisema, ni faraja kuwapata nyota hao ambao watasaidia katika kuongeza chachu ya kupata ushindi dhidi ya Cameroon jijini Younde keshokutwa Jumapili.

“Naishukuru TFF, kwa kazi kubwa waliyoifanya katika kuhakikisha kuwa wachezaji hawa wanakuwepo kwenye kikosi changu.

“Naamini sasa tupo katika nafasi nzuri zaidi ya kupata pointi tatu ugenini mbele ya Cameroon mwishoni mwa wiki hivyo Watanzania wategemee ushindi,” alisema Julio nyota wa zamani wa Simba na CDA ya Dodoma.

Kado na Samatta waliitwa katika vikosi viwili kile cha wakubwa, Taifa Stars na cha Manyara Stars ambapo ilibidi kutumika busara za uongozi wa TFF chini ya mkurugenzi wa ufundi Sunday Kayuni kuamua kuwemo kwenye kikosi kilichokwenda Cameroon hapo jana. Manyara Stars itacheza dhidi ya Cameroon katika kuwania tiketi ya kushiriki michuano ya Olimpiki inayotarajiwa kufanyika jijini London, Uingereza mwakani.

Kwa Msaada Wa Global Publisher Tanzania