KILIMANJARO STARS YAFUZU NUSU FAINALI,ZANZIBAR YATOLEWA NA UGANDA

Mshambuliaji wa Kilimanjaro Stars, Stephano Mwasika akimtoka beki wa Rwanda, Clement Mutunzi katika mchezo wa robo fainali ya Kombe la Chalenji uliofanyika kwenye Uwanjawa Taifa. Kili Stars ilishinda 1-0.

Golikipa wa timu ya Rwanda,Ndaishimie akiokoa moja ya hatari zilizokuja langoni mwake katika mchezo uliopigwa jana jioni uwanja wa Taifa,jijini Dar.Kilimanjaro Stars ilishinda 1-0.

Moja ya mabao ya penati ya uganda likitinga

kwenye wavu wa Zanzibar Heroes. Picha na John Bukuku

TIMU ya soka ya Taifa ya Tanzania Bara ‘Kilimanjaro Stars’ jana ilitinga nusu fainali ya michuano ya Kombe la Chalenji baada ya kuifunga Rwanda ‘Amavubi’ bao 1-0.

Mchezo huo ulifanyika Uwanja wa Taifa Dar es Salaam, huku wawakilishi wengine wa Tanzania, timu ya Taifa ya Zanzibar ikitupwa nje ya michuano baada ya kufungwa kwa penalti 5-3 na Uganda ‘The Cranes’.


Matokeo hayo ni zawadi kwa Watanzania ambao leo wanasherehekea miaka 49 tangu Tanzania Bara ipate Uhuru wake mwaka 1961.


Mashabiki waliojazana kwenye uwanja huo ilibidi wasubiri mpaka dakika ya 62 kwa bao la mkwaju wa penalti lililofungwa na nahodha wa Kilimanjaro Stars, Shadrack Nsajigwa baada ya John Bocco kuangushwa alipokuwa akielekea kufunga.


Kutokana na ushindi huo, Stars sasa itacheza nusu fainali kesho na Uganda ambayo jana iliitoa timu ya Taifa ya Zanzibar ‘Zanzibar Heroes’.


Timu hizo zilifungana mabao 2-2 katika mchezo wa kwanza wa robo fainali uliofanyika uwanjani hapo.


Watanzania waliokuwepo uwanjani hapo ilibidi wasubiri mpaka dakika ya 87, ambapo Aggrey Morris alisawazisha bao kwa kichwa na kufanya ubao usomeke mabao 2-2.


Lakini Morris ndiye aliyewaliza mashabiki baada ya kukosa penalti ya kwanza, wakati wa upigaji huo kutokana na matokeo ya sare hiyo.


Katika upigaji huo Waganda walitumbukiza wavuni penalti zao zote tano, huku Zanzibar ikifunga tatu, ambapo penalti ya mwisho haikupigwa kwa vile tayari Waganda walishafunga penalti zao.


Wafungaji wa penalti Zanzibar walikuwa Abdulhalim Humoud, Nadir Haroub na Waziri Salum, wakati kwa Uganda ni Isinde Issack, Sadam Juma, Danny Walusimbi, Tonny Maweje na Emmanuel Okwi.


Katika dakika 90 za kawaida, mabao ya Uganda yalifungwa na Mike Sserumanga na Okwi ambaye alifunga kwa penalti mapema kipindi cha pili, huku ya Zanzibar yakifungwa na Mcha Khamis na Morris.

PS: Kunradhi kwa kuchelewesha matokeo.

Hii imesababishwa na kwikwi ya ghafla ya mtandao.

Kwa Hisani Ya Michuzi