NMB NYERERE MASTERS 2012 KUFANYIKA OKTOBA 13 NA 14

Na Elizabeth John

MASHINDANO ya gofu ya kumuenzi Mwalimu Julius Nyerere ya NMB Nyerere Masters yanatarajiwa kufanyika Oktoba 13 hadi 14 mwaka huu katika viwanja vya Gymkhana.

Mashindano hayo ambayo yanafanyika kila mwaka, yakiwa na lengo la kumuenzi muasisi wa taifa hili na rais wa kwanza wa Tanzania, Mwalimu Nyerere yanadhaminiwa na Benki ya NMB.

Akizungumza jijini Dar es Salaam leo, Katibu Tawala wa Chama cha Gofu Tanzania (TGU), Sophie Nyanjera alisema benki hiyo imedhamini zawadi za washindi katika kila kipengele ambazo ni fulana na kofia pamoja na kusaidia shughuli nyingine za mashindano hayo.

Nyanjera alisema mashindano hayo yatakuwa ya aina yake kutokana na klabu zote za Tanzania Bara kuleta wawakilishi wao.

“Matarajio yetu ni klabu zote kushiriki ili mashindano yawe na ushindani mkubwa ukizingatia zawadi za mwaka huu ni nzuri zaidi, hivyo muda bado upo kwa wale ambao hadi sasa hawajadhibitisha kushiriki, wanatakiwa kufanya hivyo haraka,” alisema Sophie.

Alisema mashindano yatakuwa na kiingilio cha sh. 30,000 kwa kila mchezaji, na kuwataka wachezaji wa kulipwa pia kushiriki ili kuleta ushindani zaidi kwa wachezaji wa ndani.