Kamati ya Bunge yamkana Mbunge

 na Waandishi WETU

MAKAMU Mwenyekiti wa LAAC, Iddi Azzan ameiomba Kamati hiyo isihusishwe na tuhuma za mjumbe huyo za kukamatwa na Takukuru kwa tuhuma za kupokea rushwa.

Akizungumza na waandishi wa habari Dar es Salaam jana, Azzan alisema Kamati hiyo imesikitishwa na kilichotokea na kujitoa kuwa haihusiki na kitendo hicho cha Mbunge.

“Tumesikitishwa na kilichotokea, lakini ieleweke kuwa kila mtu atalipwa kwa anachofanya, sisi Kamati yetu ina wajumbe 15 na tumekuwa tukifanya kazi bila kuyumbishwa na mtu,” alisema Azzan.

Aliomba ieleweke, kuwa jambo lililotokea ni matatizo ya mtu binafsi ambayo hayahusu Kamati hiyo. “Naomba na nasisitiza kuwa matatizo ya mtu au uamuzi wake usihusishwe na Kamati … imekuwa ikifanya kazi kwa heshima na kamwe haishurutishwi na mtu,” alisema.

Awali akizungumzia mapitio ya matumizi ya hesabu za Halmashauri ya Bagamoyo za mwaka 2009/10 na 2010/11, Azzan alisema Kamati hiyo ilikataa kupokea hesabu za miradi miwili ya Mradi wa Maendeleo ya Kilimo Wilayani (DADPS) na ya Mfuko wa Afya kutokana na mchanganuo mbovu wa matumizi ya fedha zake.

Alitaka michanganuo ya miradi hiyo; wa DADPS wa Sh milioni 567 na Mfuko wa Afya Sh milioni 570 iandikwe upya ikiwa ni pamoja na kuonesha kuwa fedha hizo zimetumika kufanyia shughuli gani.

Yanusa ufisadi Aidha, aliitaka halmashauri hiyo pia kufanyia kazi suala la matumizi ya Sh milioni 15 ambazo katika kitabu cha hesabu zinaonekana zimetumika kununulia eneo la kujengea shule ya Zinga, wakati Kamati hiyo ilipotembelea eneo hilo ilibaini kuwa eneo hilo lilitolewa bure na wanakijiji wa Zinga.

“Hapa kuna namna haiwezekani fedha hizi zote zionekane zimetumika kununulia eneo ambalo limetolewa bure na wanakijiji, Kamati inaagiza halmashauri ilete majibu na kama zimeliwa, mhusika awajibishwe kwa kufikishwa kwenye vyombo vya sheria,” alisema Azzan.

Pia aliziagiza halmashauri zote nchini ambazo nyaraka zake ziko mikononi mwa Polisi kwa ajili ya ushahidi, zihakikishe kabla ya kupelekwa huko, nyaraka hizo zitolewe kivuli ili zitumike kwa matumizi mengine ya halmashauri.

*Imeandikwa na Halima Mlacha na Flora Mwakasala

Chanzo: Habari Leo.