MSIBA MKUBWA: ADAM LUSEKELO MWAKANG'ATA

 

NDUGU ZANGU,
NIMEPOKEA KWA MASIKITIKO MAKUBWA HABARI ZA MSIBA WA NDUGU YETU KATIKA MAPAMBANO, ADAM LUSEKELO MWAKANG’ATA. NIMEMEANZA KUMSOMA ADAM TANGU NIKIWA TAMBAZA SEKONDARI MIAKA YA 80. ADAM LUSEKELO NI KAKA YANGU KATIKA UANDISHI, NI KAKA WA WENGI.

KUPITIA KAZI ZAKE, KWANGU MIMI, KWA NAMNA YAKE, ADAM LUSEKELO AMEKUWA AKIFANYA KAZI YA KUAMSHA FIKRA ZA WATANZANIA ILI WAIFANYE WENYEWE KAZI YA KUJIKOMBOA KIFIKRA. ALIIFANYA KAZI HIYO KATIKA MAZINGIRA MAGUMU TANGU ENZI ZA MFUMO WA CHAMA KIMOJA.

ADAM AMEWASAIDIA WATANZANIA WENGI KUJIBU SWALI WANALOJIULIZA LAKINI MAJIBU YAKE WANAPEWA NA WASIOTAKA SWALI HILO LIULIZWE, TENA KWA KUKIMBILIA KULIJIBU KABLA YA UMMA HAUJATAFAKARI NA KUTOA JIBU. SWALI NI HILI; NI NANI ADUI WA UMMA?

TUNAJUA, KUWA KATIKA KUIFANYA KAZI YAKE, KUNA AMBAO WALIMCHUKIA ADAM KWA KAZI YAKE YA KUWAAMSHA WATANZANIA KUTOKA USINGIZINI.

ADAM AMEONDOKA, LAKINI, BILA SHAKA, MOYONI ALIAMINI, KUWA AMEACHA WENGI WA KUIENDELEZA KAZI YAKE. NDIO, ADAM LUSEKELO AMEONDOKA WAKATI WATANZANIA WAKIWA KATIKA HATUA ZA MWISHO ZA KUJIKOMBOA KIFIKRA.

ADAM LUSEKELO ATAENDELEA KUISHI, ATAKUMBUKWA NA WENGI.

MAGGID MJENGWA,

IRINGA

JUMAMOSI, APRILI, 2, 2011

http://mjengwa.blogspot.com