STARS KUIVAA UGANDA THE CRANE

Na Khadija Mngwai
TAIFA Stars chini ya Kocha Jan Poulsen, inatarajia kuvaana na timu ya Taifa ya Uganda, The Cranes katika michuano ya All African Games kanda ya tano kati ya Aprili 15 na 17, mwaka huu jijini Kampala.

Akizungumza na Championi Jumatano, Ofisa Habari wa TFF, Boniface Wambura alisema Stars itacheza moja kwa moja katika raundi ya kwanza ya michuano ya All African Game kwa kukutana na Uganda tofauti na timu nyingine ambazo zilicheza hatua ya mchujo Januari, mwaka huu ili kupata nafasi ya kucheza hatua ya raundi ya kwanza.

“Stars itacheza michuano ya All African Game kanda ya tano ikiwa pamoja na timu za Eritrea, Kenya na Uganda ambapo kutakuwa na ushindani mkubwa kutokana na ubora wa timu husika.

“Mchezo wa kwanza utakuwa ugenini kati ya Aprili 15 na 17 siku za wikiendi na marudiano yanatarajia kuwa kati ya Aprili 29 na Mei Mosi, mwaka huu” alisema Wambura.

Wambura alisema mchezo huo utatumika kuiandaa Stars kwa mechi ya marudiano dhidi ya Afrika ya Kati kufuzu Kombe la Afrika 2012 kati ya Juni 3 hadi 5, mwaka huu, ikiwa ni pamoja na kutafuta mechi kadhaa za kirafiki za nje ya nchi ili kuweza kujihimarisha zaidi.

Alisema TFF imepanga kukiingiza kambini kikosi cha Stars siku 10 kabla ya mchezo siku ambazo zitasaidia wachezaji kuzoeana na kujipanga kuhakikisha timu inafanya vizuri.