News Alert:Buhari anusia ushindi wa urais Nigeria

Jenerali Muhammadu Buhari anaongoza kwa zaidi ya kura milioni mbili zaidi ya mpinzani wake wa karibu ambaye ni rais Goodluck Jonathan

Mgombea wa Upinzani nchini Nigeria, Muhammadu Buhari wa chama cha APC anakaribia kutwaa ushindi Urais.

Huku yakisalia majimbo machache, Buhari anaongoza kwa karibu kura milioni tatu mbele ya Rais wa sasa Goodluck Jonathan.

Awali kulikua na matukio ya kurushiana maneno katika ukumbi mkuu wa hesabu ya kura pale mwakilishi wa chama tawala-PDP Elder Orubebe alipolalamikia tume ya uchaguzi kwa kupendelea.

Kumekua na kurushiana cheche za maneno makali katika ukumbi mkuu wa kuhesabu kura nchini Nigeria.

Mwakilishi wa chama tawala PDP-Elder Orubebe, alivuruga shughuli ya kutangazwa matokeo ya kura akidai tume ya uchaguzi ilikua ikipendelea upande mmoja.

Mawakala wa wagombeaji wakuu

Matokeo ya Kura ya Urais kufikia sasa:

Jen Buhari: Kura 14.2m ;

Ametimiza asili mia 25% katika majimbo 24

Jonathan: Kura 11.4m ;

Ametimiza asili mia 25% katika majimbo 24

Matokeo ya majimbo 33 + Abuja

Wagombeaji wanahitaji kushinda robo ya kura katika majimbo 24 ilikutangazwa mshindi katika raundi ya kwanza

Mwenyekiti wa tume ya kitaifa ya uchaguzi mkuu Nchini Nigeria, Attahiru Jega, alimuonya Elder Orubebe kuwa mwaangalifu kutokana na matamshi yake hayo aliyotoa.

Mwandishi wa BBC aliyeko ukumbi huo mjini Abuja anasema huenda vurugu hizo ni ishara kuwa, PDP inahisi kushindwa.

Huku majimbo mengi yakitoa matokeo yake mgombea wa upinzani, Muhammadu Buhari wa chama cha APC, anaendelea kuongoza kwa wingi wa kura, huku akifuatiwa na Rais Goodluck Jonathan.

Generali Buhari wa chama cha All Progressives Congress (APC) anaonekana kusajili matokeo mema mapema hata kabla ya kuhesabiwa kwa kura za mjini Lagos.

Matokeo ya uchaguzi mkuu nchini Nigeria yanatarajiwa kutangazwa saa chache zinazokuja wakati majimbo yaliyosalia yakisubiriwa kutangaza matokeo yao.

Tume ya uchaguzi imesema itaendelea kutangaza matokeo ya uchaguzi Jumanne

Mwandishi wa BBC mjini Abuja amesema mchuano bado ni mkali.

Mwandishi wa BBC anasema yeyote atakayeshinda, litakuwa jambo la kushangaza iwapo mgombea atakayeshindwa hatatamka kuwepo kwa mbinu chafu.bbc swahili