Australia yatoa magari mawili ya kubeba wagonjwa mahututi

WIZARA ya Afya ya nchini Australia (GHAWA), kupitia Idara ya Uuguzi  na Ukunga  imetoa gari mbili za kusafirisha  wagonjwa  mahututi (Ambulance ), kwa mkoa wa Pwani wilayani Kisarawe.

 

Akizungumza wakati wa makabidhiano  Naibu Katibu Mkuu wa Wizara ya Afya na Ustawi wa Jamii, Dk Regina Kikuli, alisema kuwa gari hizo zitatumika kama chachu ya kutokomeza vifo vya mama na mtoto katika Hospitali ya wilaya ya Kisarawe.Alisema kuwa msaada huo umekuja wakati muafaka kwa sababu  wilaya hiyo imekuwa ni miongoni mwa zile zinazokabiliwa na changamoto lukuki ikiwemo ya  ufinyu wa  vitenda kazi katika vituo vya afya.

“2011 wizara ilianza kushirikiana na Australia  hususani katika mambo muhimu ya afya kama  upanuzi wa vituo vya afya  hususani kwa kuviboresha kutoka kwenye hospitali za wilaya  hadi mkoa, kwasababu serikali peke yake haiwezi  kulingana na ukubwa wa changamoto zake“ alisema Dk Regina.

 

Dk Regina aliongeza kuwa mbali na msaada huo,  wataangalia ujuzi wa  Wauguzi katika vituo vya afya nchini ili kubaini mapungufu yao na kuyaboresha.

 

Naye Mwakilishi  kutoka  Australia Catherine Strodatt  alitumia fursa hiyo kueleza kuwa nchi hiyo itakuwa mstari wa mbele kushirikiana na Tanzania  katika suala la afya.