MCT TANZANIA YATOA UFAFANUZI KUHUSU TAMKO LA TUME YA UTANGAZAJI KUKIFUNGIA CHOMBO CHA HABARI KITAKACHO RIPOTI HABARI ZA UAMSHO ZA UCHOCHEZI

Meneja wa Baraza la Habari kanda ya Zanzibar(MCT)Suleiman Seif Omar akifafanua jambo kwa Waandishi wa Habari hawapo pichani kuhusu tamko la Tume ya utangazaji Zanzibar kupiga marufuku kuripoti taarifa za UAMSHO zenye kuashiria uvunjifu amani kushoto ni Kaimu Katibu Mtendaji wa MCT John P.Mireny

………………………….

Na Maelezo Zanzibar 

 Vyombo vya habari nchini vimeshauriwa kujiepusha kuandika habari za uchochezi zinazoweza kuhamasisha chuki ndani ya jamaii na hatimaye kuvuruga amani na utangamano wa nchi.

 Ushauri huo umetolewa na Kaimu Katibu Mkuu wa Baraza la Habari Tanaznia (MCT) John Mireny alipokuwa akizungumza na Waandishi wa Habari katika Ofisi za Baraza hilo Mlandege Zanzibar kuhusiana na Tamko lililotolewa na Tume ya Utangazaji Zanzibar la kupiga marufuku matangazo yote yanayohusiana na vurugu zinazohusishwa na wafuasi wa Jumuiya ya UAMSHO Zanzibar.

 Amesema pamoja na ukweli kwamba Baraza la Habari linatambua na kutetea kwa nguvu zote uwepo wa uhuru wa Vyombo vya habari na uhuru wa kujieleza, Baraza linasisitiza kwamba vyombo hivyo vinawajibu mkubwa wa kulinda amani na jamii kwa ujumla.

 Amesema Tume haikukosea kupiga marufuku taarifa za Jumuiya ya UAMSHO zinazoashiria fujo na uvunjifu wa amani na kwamba hizo ni taarifa ambazo hazikubaliki kutolewa katika vyombo vya habari.

 Hata hivyo ameongeza kuwa taarifa zinazohusu UAMSHO ambazo hazihusiani na fujo na uvunjifu wa Amani zinaweza kutolewa na vyombo vya habari nchini ili kuipasha jamii habari za Jumuiya hiyo.

 Ametoa mfano wa habari za Jumuiya ya UAMSHO ambazo zinaweza kuripotiwa kuwa ni pamoja na mwendelezo wa Kesi inayohusu Viongozi waandamizi wa Jumuiya hiyo Uchimbaji wa Visima habari za kimaendeleo uchumi na kadhalika .

 Nae Meneja wa Baraza hilo Kanda ya Zanzibar Suleiman Seif Omar aliwataka wandishi wa habari kuwa wadadisi na wafatiliaji kwa baadhi ya taarifa zinazo tolewa na vyombo vya dola na isishie kukaa kimya bila yakupata ufafanuzi .

 Aidha alifahamisha kua iwapo mwandishi hakua makini katika kuandika habari zake na kuandika habari za utenganishaji jamii, atambue kua jamii hiyo itakua ni vigumu kuirejesha katika maelewano jambo ambalo halifai kwa mwandishi kufanya hivyo.

 “Neno moja linaweza kuleta maafa kwa jamii kwa hivyo wandishi wanapaswa wawe makini katika kutekeleza kazi zao kwani amani ikitoweka ni vigumu kuirejesha”alisema Suleimani Seif .

 Aliwakumbusha waandishi kua fani ya uandishi wa habari inamaadili  yake yanayopaswa kufuatwa katika kuandika habari na iwapo hayakufuatwa na kutanguliza ushabiki ni hatari na  inaweza kusababisha mtafaruku ndani ya jamii.