Makamu wa Kwanza wa Rais wa Zanzibar Maalim Seif Sharif Hamad Akutana na ujumbe wa Jumuiya ya nchi za visiwa katika Bahari ya Hindi

   Mjumbe wa Jumuiya ya nchi za visiwa katika bahari ya hindi Raj Mohabeer (katikati) akizungumza katika mkutano wao na Makamu wa Kwanza wa Rais wa Zanzibar Maalim Seif Sharif Hamad nyumbani kwake Mbweni. Kulia ni mjumbe wa Jumuiya hiyoCorine Paya.

   Makamu wa Kwanza wa Rais wa Zanzibar Maalim Seif Sharif Hamad akizungumza na Ujumbe wa nchi za visiwa katika bahari ya hindi huko nyumbani kwake Mbweni Zanzibar

Makamu wa Kwanza wa Rais wa Zanzibar Maalim Seif Sharif Hamad akiwa katika picha ya pamoja na wadau wa jumuiya ya nchi za visiwa vya bahari ya hindi pamoja na baadhi ya watendaji wa Ofisi ya yake.Picha na Salmin Said-Ofisi ya Makamu wa Kwanza wa Rais Zanzibar 

--

Makamu wa Kwanza wa Rais wa Zanzibar Maalim Seif Sharif Hamad amesema Zanzibar inapata manufaa makubwa kutokana na ushirikiano wake na Jumuiya ya nchi za visiwa katika bahari ya Hindi.

 

Amesema Serikali inafuatilialia taratibu za kikatiba ili kuweza kuwa mwanachama kamili wa Umoja huo.

 

“Iwapo tutakuwa wanachama kamili, mashirikiano yatakuwa makubwa na imara zaidi na bila shaka manufaa yataongezeka”, alisema Maalim Seif.

Maalim Seif alieleza hayo wakati akizungumza na ujumbe wa Jumuiya ya nchi za visiwa katika bahari ya hindi yenye makamo makuu yake nchi Mauritius. Mazungumzo hayo yalifanyika nyumbani kwake Mbweni nje kidogo ya Mji wa Zanzibar.

 

Amesema Visiwa vya Zanzibar vinakabiliwa na uhaba wa ardhi kutokana na ongezeko la Idadi ya watu, na kwamba serikali ina mpango wa kuelekeza ujenzi wa nyumba za ghorofa katika maeneo ya mjini ili kukabiliana na tatizo hilo la upungufu wa ardhi.

 

Kwa upande wake mjumbe wa umoja huo Bwana Raj Mohabeer amesema Zanzibar itaendelea kunufaika na mashirikiano ya nchi za visiwa hata kama si mwanachama wa umoja huo.

 

Amesema umoja huo umevutiwa na mazingira ya Zanzibar na kuelezea matumaini yake kuwa Jumuiya hiyo itakuwa ikifanya mikutano yake hapa Zanzibar angalau mara moja kwa mwaka.

 

Nchi hizo za visiwa katika bahari ya Hindi zinashirikiana katika maeneo tofauti yakiwemo kukabiliana na majanga, mabadiliko ya tabia nchi pamoja na uhifadhi wa mazingira ya baharini.

 

 Na 

Hassan Hamad 

Ofisi ya Makamu wa Kwanza wa Rais Zanzibar