Kampuni ya Agape Associates LTD yateuliwa kuweka miundombinu ya Digitali Zanzibar

Waziri wa Habari Utamaduni Utalii na Michezo Said Ali Mbarouk akizungumza na Wajumbe wa Kamati ya Usimamizi na Ufatiliaji wa uwekaji miundombinu ya Digital ZBC hafla iliofanyika katika Jengo la Wizara ya Habari Utamaduni Utalii na Michezo Zanzibar.PICHA NA MAKAME MSHENGA-HABARI MAELEZO ZANZIBAR.

 …………………………………

Na Ali Issa-Maelezo Zanzibar  

 Serikali ya Mapinduzi ya Zanzibar kupitia Wizara ya Habari Utamaduni ,Utalii na Michezo imeiteuwa kampuni ya Agape Associates LTD kufanya kazi ya kuweka miundombinu ya matangazo ya mfumo wa Digitali ili kuwahi tarehe ya mwisho ya matangazo ya Analogi ambayo ni 31 Disemba mwaka huu kama ilivyokubaliwa kwa nchi za Maziwa makuu.

 Aidha wizara imemteuwa Hassan Katetei Mdachi kutoka Kampuni ya Thornhead Engineering System,kutoka nchini Kenya kuwa Mshauri elekezi katika kufanikisha shughuli hiyo.

 Hayo yamebainishwa na Waziri wa Habari Utamaduni ,Utalii na Michezo Saidi Ali Mbaruok wakati alipokuwa akizindua Kikosi kazi kitakachosimamia uwekaji wa miundo mbinu wa mtambo wa DIJITAL-ZBC huko Ofisini kwake Kikwajuni Mjini Zanzibar. 

 Katika uzinduzi huo amesema amelazimika kuunda kamati  kwani mfumo wa dijital harakati zake ni kubwa na za muda mfupi kufikia lengo ,hivyo kamati hiyo itafuatilia kwa karibu mahitaji ya dijital ili wananchi waweze kufaidika na huduma zake kwa wakati.

 Kamati hiyo itakuwa na lengo la kufuatilia na kusimamia kwa karibu shughuli za uwekaji wa mitambo ya dijital katika vituo vyote vya unguja na Pemba.

 Waziri Said Mbarouk amesema majukumu mengine ni pamoja na kusimamia utaratibu utakao weza kupatikana Ving’amuzi pamoja na njia zitakazo weza kurahisisha wananchi kuvipata kwa wakati pamoja na kuanda na kusimamia upatikanaji wa mandhari kwakuzingatia misingi ya kibiashara ,mila ,silka na hali ya ushindani iliopo .

 Ameyataja majukumu mengine ya Kamati hiyo kuwa ni pamoja na kubuni njia bora zitakazo saidia mtandao wa dijital kufanya kazi kwa ufanisi na kujitegemea. 

 Katika uzinduzi huo Katibu Mkuu wa Wizira ya Habari Utamaduni Utalii na Michezo Zanzibar Ali Saleh Mwinyikai aliteuliwa kuwa mwenyekiti wa Kamati hiyo yenye wajumbe 13.