Precision Air yanyakua tuzo Afrika

Precision Air – Shirika la ndege linaloongoza Tanzania imenyakua tuzo ya Shaba baada ya kushika nafasi ya tatu katika mashindano ya shirika bora la ndege Afrika kwa mwaka 2011/2012, yaliyoendeshwa na ‘African Aviation News Portal’.

Mara baada ya kupokea taarifa hizo, Mkurugenzi Mkuu na Meneja Mwendeshaji wa   Bw. Alfonse Kioko alisema, “Kutambuliwa na wateja wetu pamoja na washindani wetu ni heshima kubwa sana. Kushika nafasi ya tatu Afrika si jambo dogo. Napenda kuwadhibitishia wateja wetu kwamba tunaendelea vyema na mipango yetu ya kupanuka kibiashara na kuwahakikishia pia huduma bora yatakayopita mategemeo yao.”

Kwa mujibu wa African Aviation kura zilizopigwa na wasomaji wake, wataalam wa masuala ya anga, na wasafiri wa ndege wa mara kwa mara “zimeangalia ukuaji mzima wa kampuni, huduma kwa ujumla, pamoja na sifa na uhakika wa huduma za kampuni.”

Precision Air imeshika nafasi ya tatu nyuma ya Ethiopian Airlines iliyoshinda nafasi ya kwanza na kuzawadiwa tuzo ya Dhahabu ikifuatiwa na Kenya Airways (wapili) walioshinda tuzo ya Fedha.

Kura zilipigwa kutumia njia ya mtandao katika tovuti hiyo, pamoja na kupiga kura za moja kwa moja katika vikao, makongamano, na matukio mbali mbali yaliyoshirikisha shirika hilo la African Aviation. Zaidi ya wapiga kura 20,000 walishiriki.

Jumla ya mashirika ya ndege zilizoshiriki mashindano hayo yalikuwa 25; Air Algerie, Air Botswana, Air Malawi, Air Namibia, Air Nigeria, Air Uganda, Arik Air, Asky Airlines.

Wengine ni; Camair-Co, Comair South Africa, Dana Air, Egyptair, Ethiopian Airlines, Fly540, Kenya Airways, Mozambique Airlines, Precision Air, Royal Air Maroc, Rwandair, Senegal Airlines, South African Airways, Sudan Air, TAAG Angola, TACV and Zambezi Airlines.

African Aviation, pitia wasomaji na wafuatiliaji (followers) wake, wanatambua mashirika yenye maendeleo yaliyojizatiti katika huduma bora kwa wateja, utaalamu, ubunifu na kuchangia mafanikio katika sekta ya utalii Afrika. Tuzo hii “si tu kipimo cha mafanikio ya mashirika ya ndege bali pia ni ishara ya kuridhishwa kwa wateja katika sekta zote za usafiri wa anga,” inasoma kipande cha taarifa kutoka tovuti ya African Aviation.

Katika miaka ya hivi karibuni shirika la Precision Air limeweza kunyakua zawadi zifuatazo; ‘Best Scheduled Domestic Airline in Tanzania’ kwa mwaka 2011 iliyozawadiwa na Umoja wa Wakala wa Tiketi za ndege Tanzania (TASOTA); ‘Regional Airline of the Year’ iliyotolewa na Asasi ya Mashirika ya ndege Afrika (AFRAA ) 2010; ‘CEO’s Most Respected Company in Tanzania’  iliyofanyika kwa utafiti wa Pricewaterhouse Coopers  kwa ukanda wa Afrika Mashariki 2008/9; ‘African Deal of the Year -2008’ iliyotolewa na Jarida la Airfinance kwa ajili ya mkataba wa dola 129 milioni ziliwezesha Precision Air kupata ndege 7 mpya aina ya ATR; pamoja na ‘Aircraft Leasing Deal of the Year in Africa- 2008’ iliyozawadiwa na jarida la Jane's Transport Finance kwa ajili ya mkataba huo huo wa ndege mpya 7.

Tayari African Aviation imeanza tena mchakato wa kutafuta Shirika bora la ndege la Kiafrika kwa mwaka 2012/2013, kwa yeyote anayependa kushirika kwa kupigia kura shirika letu la ndege la Precision Air anaweza tembelea tovuti ifuatayo.

http://www.african-aviation.com/index.php