SBL yaahidi kuendelea kudhamini gofu

 Mwandishi Wetu

KAMPUNI ya Bia ya Serengeti (SBL) imeahidi kuendelea kudhamini mashindano mbalimbali ya gofu katika ngazi mbalimbali ikiwa ni mkakati wa kampuni hiyo wa kuundeleza mchezo huo.

Meneja wa Tusker, Rita Mchaki alisema wakati wa mashindano ya ‘Tusker Malt Waitara Trophy’ yaliyofanyika katika viwanja vya Lugalo mwishoni mwa wiki kuwa kampuni hiyo imepanga kuweka bajeti endelevu katika udhamini wa mchezo huo kila mwaka.

Mashindano hayo ambayo yatafanyika kila mwaka yalidhaminiwa na SBL kupitia kinywaji chake cha Tusker Malt kwa thamani ya milioni kumi ambapo timu za kada mbalimbali ikiwemo wachezaji waalikwa kutoka nchi jirani walishiriki.

Alisema SBL imekuwa na mchango mkubwa katika michezo hususani upande wa mpira wa miguu na kwamba sasa inapanga kuwekeza katika michezo mingine ili ushiriki wa Tanzania katika michezo ya kimataifa uwe katika wigo mpana.

“Tumewezesha kufanyika kwa mashindano haya lakini hatutaishi hapa tutafanya hivi kila mwaka kulingana na uwezo wetu kifedha na sasa SBL ina mipango ya kupanua wigo wa kuwekeza katika michezo ili ushiriki wa Tanzania katika michezo ya kimataifa iwe katika wigo mkubwa,” alisema Mchaki.

Pamoja na mashindano hayo SBL pia imedhamini mashindano makubwa mawili ya gofu mwezi Novemba mwaka huu ya Gofu ya Afrika Mashariki 2011 yaliyoisha hivi karibuni katika viwanja vya Gynkhana Arusha.

Katika mchuano huo Salehe Yahaya aliibuka mshindi kwa upande wa vijana akipata jumla ya mirejesho 71 akiwabwaga wapinzani wake Kadio Hassan na Braison Nyenza waliopata mirejesho 75 na 77.

Katika kundi la wachezaji wa rika la juu kombe lilienda kwa Brigedia Generali mstaafu Julius Mbilinyi aliyepata mirejesho 70 akimbwaga Simon Sayore na Mkuu wa Jeshi Mstaafu George Waitara walioshika nafasi za pili na tatu kwa mirejesho 73 kwa 78.

Kwa upande wa wanawake, kikombe Hawa Wanyeche alipata mirejesho78 na Angel Eaton aliyechukua nafasi ya pili alipata 81 na Fatuma Makame alishika nafasi ya tatu kwa jumla ya mirejesho 82.

SBL ilitoa zawadi zaz fedha taslimu kwa viwango tofauti kwa wachezaji wote pamoja na zawadi mbalimbali za promosheni ikiwa kama changamoto kwa washiriki hao kufanya vizuri katika mshindano yajayo mwakani.