Mama Kikwete awataka wanafunzi kutochanganya elimu na mapenzi

Mgeni rasmi Mke wa Rais Mama Salma Kikwete akiongea katikamahafali(kulia) ni Mwenyekiti waJOHA TRUST Solomon Odunga katika maadhimisho ya miaka 11 ya shule Mfano ya sekondari ya Wasichana ya Barbro Johansson ,pamoja na Mahafali ya 9 ya kidato cha IIV na Mahafali ya 6 ya kidato cha VI.

Mke wa Rais na Mwenyekiti wa Taasisi ya WAMA Mama Salma Kikwete akimkabidhi cheti mmoja ya kati ya wanafunzi wa shule ya mfano ya Sekondari ya wasichana ya Barbro Johansson(Sept,25,2011) jijini Dar es Salaam wakati wa mahafali ya 9ya kidato cha IV na mahafali ya 6 ya kidato cha IV pamoja na maadhimisho ya sherehe ya11 ya shule ya mfano. 

Mke wa Rais na Mwenyekiti wa taasisi ya WAMA Mama Salma Kikwete akimpongeza Waziri wa Ardhi, Nyumba na Maendeleo ya Makazi, Mbunge wa Muleba Kusini na Mwenyeliti wa Mwanzilishi wa JOHA TRUST Prof. Anna Tibaijuka Sept 25,2011 huku Luguruni jijini Dar es Salaam katiak maadhimisho ya miaka 11 ya shule Mfano ya sekondari ya Wasichana ya Barbro Johansson ,pamoja na Mahafali ya9 ya kidato cha IIV na Mahafali ya 6 ya kidato cha VI.

Bendi ya shule ya Barbro Johansson ikiwaburudisha wagaeni katika mahafali

Picha ya pamoja na wanafunzi waliohitimu katika sekondari ya BABRO JOHANSSON

 

Na Anna Nkinda – Maelezo

 

Wanafunzi nchini wametakiwa kuachana na tabia ya kujiingiza katika mapenzi wakiwa masomoni kwani kwa kufanya hivyo watakuwa wanahatarisha maisha yao kwa kupata maambukizi ya Virusi vinavyosababisha Ugonjwa wa Ukimwi na ujauzito.

Wito huo umetolewa jana na Mke wa Rais Mama Kikwete wakati akiongea na wanafunzi wa shule ya Sekondari ya wasichana ya Barbro Johansson iliyopo Luguruni jijini Dar es Salaam kwenye sherehe za mahafali ya kidato cha nne na cha sita.

Mama Kikwete ambaye pia ni Mwenyekiti wa Taasisi ya Wanawake na Maendeleo (WAMA) aliwaambia wanafunzi hao kuwa elimu wanayoipata itafungua maisha yao na ya jamii nzima. Itawapa njia ya kuwa na uwezo kiuchumi, itawajengea uwezo wa kujiamini na kuweza kupaza sauti zao na kusikika kwani watakuwa na upeo mkubwa wa kuchambua mambo na kutoa maamuzi ya busara katika maisha.

“Ninafahamu kwamba walimu, wazazi na walezi wamekuwa wakiwausia na kuwapa miongozo katika maisha yenu ya kutafuta elimu. Jambo ambalo ningependa muendelee kulizingatia kwa makini ni kwamba elimu mliyoipata bado ni mwanzo tu, hasa ukizingatia kukua kwa utandawazi.

Siku hizi mabadiliko ni ya haraka mno na yanamgusa kila mtu katika kila nyanja ya maisha. Ni vizuri mkajua kwamba ni wajibu wenu kuendelea kujifunza mbinu mpya za kuyakabili mabadiliko haya”, alisema Mama Kikwete.

Mwenyekiti huyo wa WAMA alimalizia kwa kuwataka wanafunzi hao kuchukua tahadhari dhidi ya ugonjwa wa Ukimwi kwani elimu waliyonayo haitakuwa na maana kama wataruhusu kuambukizwa ugonjwa huo na kupata ujauzito ambao utawafanya wakatize masomo yao na hivyo kutotimiza ndoto zao.

Akisoma taarifa ya shule hiyo Mkuu wa Shule Halima Kamote alisema kuwa tangu kuanzishwa kwa shule hiyo miaka 11 iliyopita jumla ya wahitimu 471 wa kidato cha nne na 282 wa kidato cha sita walihitimu masomo yao na kufaulu kwa kiwango cha juu na kufanikiwa kujiunga na vyuo mbalimbali na vya elimu ya juu hapa nchini.

Kamote alisema , “Katika mahafali ya leo tunao wahitimu 76 wa kidato cha nne na 151 wa kidato cha sita ambao tunaamini kutokana na elimu waliyoipata kutoka kwa walimu wao watafanya vizuri katika mitihani yao ya kitaifa na hivyo kuendelea kutunza heshima ya shule yetu katika jamii”.

Shule hiyo yenye wanafunzi 632 wa kidato cha kwanza hadi cha sita, walimu 37 na wafanyakazi wengine 27 imekuwa ikipata msaada kutoka Serikali ya Sweden kupitia ubalozi wake hapa nchini ambao umetumika kujenga majengo, matanki ya kuhifadhi maji na kutoa ufadhili kwa wanafunzi wenye vipaji kilaaluma ambao wanatoka katika familia zenye kipato duni.

Alizitaja changamoto wanazokabiliana nazo kuwa ni upungufu wa majengo, wafadhili wakuu wa shule hiyo ambao ni SIDA wanatarajia kukatisha ufadhili wao mwishoni mwa mwaka huu na hivyo kuzua tatizo la kukosekana kwa ufadhili wa uhakika wa ada kwa wanafunzi wanaotoka katika familia duni.

“Changamoto nyingine zinazotukabili ni wanafunzi wanaofadhiliwa na shule hii wanakosa mikopo pale wanapojiunga na elimu ya juu pengine ni kwa kuwa wanatoka katika shule binafsi ambako kuna ulipaji wa ada unaoendana na gharama halisi na mahitaji ya kujiunga na shule ni makubwa kuliko uwezo wa shule”, alisema.

Kila mwaka sherehe za mahafali ya shule hiyo hufanyika tarehe 25 Septemba ili kuienzi siku aliyozaliwa Dk. Mama Barbro Johansson ambaye ni mmisionari, mwalimu, mwanaharakati na mwanadiplomasia kutoka nchini Sweden ambaye alitoa mchango mkubwa katika kupigania elimu ya watoto wa kike na wa kiume.(Picha na Mwanakombo Jumaa_MAELEZO)