SERIKALI KUONGEZA UMEME WA KUTUMIA GESI ASILIA

\

Katibu Mkuu wa Wizara ya Nishati na Madini David Jairo akizungumza na waandishi wa habari (hawapo pichani) jijini Dar es Salaam.

---

NA.MAGRETH KINABO –MAELEZO

Serikali  imesema iko katika mchakato wa kufanya  mazungumzo  na kampuni ya Kiserikali ya China Petroleum Oil kutoka  China kwa ajili ya kujenga bomba la  kuongeza  uzalishaji wa  umeme kwa kutumia gesi asilia.

Hayo yalisemwa na Katibu Mkuu wa Wizara ya Nishati na Madini, David Jairo wakati akizungumza  na waandishi wa habari  kwenye viwanja vya Mnazimmoja baada ya kutembelea  shughuli za maonyesho za wizara yake katika maadhimisho ya wiki ya utumishi wa Umma.

Aliongeza kuwa ili kuharakisha mchakato huo, mazungumzo hayo yanatarajia kutafanyika wiki ijayo na kampuni hiyo inatarajia kusaidiana na Shirika la Maendeleo ya Mafuta Nchini (TPDC)  ili kuzalisha umeme kwa wingi.

Katibu Mkuu huyo alisema juhudi zinafanyika ili kuwezesha upatikanaji wa umeme wa gesi kupitia nishati hiyo kwa wingi, ambapo ili kutekeleza mpango huo, itakopa kiasi fedha  dola za Marekani  milioni 778  kutoka serikali ya China.

Aliongeza kuwa gesi asilia  inayozalishwa na mitambo ya Songosongo hailitoshelezi mahitaji  ya kuzalisha  umeme  kwa wingi na matumizi mengine.

‘Tunataka kujenga bomba  la   inchi 30 kutoka Mtwara hadi  Dar es Salaam  ili kuweza  kupata gesi ya kuzalisha  umeme  mwingi ikiwezekana na  matumizi ya majumbani,” alisema Jairo.

Akizungumzia kuhusu suala  la upatikanaji wa umeme  wa uhakika alisema serikali imeweka utaratibu hivyo imejiandaa kuondokana na tatizo ndani ya kipindi cha miaka miwili au mitatu ijayo.

Aidha Katibu Mkuu huyo aliongeza tayari kampuni ya Symbion Power inazalisha umeme wa MW 75.

Ufafanuzi huo ulitolewa na Jairo kufuatia malalamiko kutoka kwa wananchi  waliokuwa wanatembelea wizara hiyo, ambapo pia walilalamikia tatizo la kutozwa ushuru wa REA  na EWURA  kama alivyoelezwa na  Mjiolojia Mkuu kutoka wizara hiyo, Habbas Ngulilapi .

Jairo alisema  ushuru huo unatozwa kwa ajili ya kusambaza  umeme vijijini.

Kwa upande wa madini  alisema tatizo la mgogoro wa mgodi wa Nyamongo uliopo Tarime, serikali  inalitafutia ufumbuzi tatizo hilo kwa kushirikisha wadau mbali mbali.

Hata hivyo aliwataka wananachi kuelwa suala la uwekezaji kwa kuwa ni muhimu kwa taifa .

Alisema uwekezaji unaogeza mapato kwa nchi ikiwemo maendeleo, hivyo wawatumie Wabunge, Wakuu wa Wilaya , Madiwani , Viongozi wa Serikali za Mitaa ili kuweza kupata elimu juu ya umuhimu wa wawekezaji.