TAFSIRI YAKE MAGGID MJENGWA KWA KILICHOTOKEA KWENYE MAANDAMANO YA CHADEMA HAPO JANA

Ndugu Zangu,


JUMA lililopita Watanzania, na dunia pia, tuliona kupitia televisheni na vyombo vingine vya habari, picha zikiwaonyesha polisi wetu wakipambana na waandamanaji wafuasi wa Chama Cha Wananchi, CUF. Ilisikitisha sana.


Pengine polisi ‘kupambana’ na waandamanaji si neno sahihi. Mara nyingi tunachokiona ni polisi ’kuwaandama’ waandamanaji. Hii ni pamoja na polisi kuwatawanya waandamanaji kwa virungu, mabomu ya machozi, risasi za mipira na hata za moto.


Jana tena, Watanzania na dunia, tumeona picha za televisheni zikiwaonyesha polisi wetu wakipambana ama kuwaandama waandamanaji wafuasi wa CHADEMA kule Arusha . Imeripotiwa na BBC kuwa kuna Watanzania waliopoteza maisha. Inasikitisha sana. Na unapoangalia picha hizi zenye kuharibu taswira njema ya nchi yetu ndani na nje ya mipaka yetu unajiuliza; KWANINI?

Kinachonijia haraka kichwani ni hofu ya mfumo. Linanijia pia neno ´MAANDAMANO´. Afrika MAANDAMANO ni neno baya sana ukilitamka mbele ya watawala. Kuandamana ni 'kuiandama' Serikali. Ni kama ilivyokuwa katika nchi za Kikomunisti kabla ya kuangushwa kwa ukuta wa Berlin. Kwa wasiojiamini ndani ya mifumo ya kiutawala Afrika, kuandamana ni sawa na kutaka ´Kuuvunja Ukuta´. Na kwa watu wa nchi zetu hizi, nao wameanza kuuona ukuta.


Kwa watawala Afrika, hakuna msamiati wa ’ Maandamano’ , kuna ’ MATEMBEZI ya MSHIKAMANO’. Afrika hakuna dhambi ya kuandamana kuunga mkono au kupongeza kauli au jambo lililotendwa na upande wa utawala. Dhambi ni kuandamana kupinga. Tujiulize tena; nini maana ya maandamano?

Tunaamini katika demokrasia, maandamano ni namna pia ya kujieleza. Muhimu katika maandamano ni kuhakikisha kuwa yanakuwa ni ya amani na utulivu. Wenye kuandamana waandamane na wengine waendelee na shughuli zao. Na hapa ni jukumu la wenye kuandaa maandamano kwa kuwashirikisha polisi.


Kuwepo na utaratibu unaoeleweka. Wapi waandamanaji watakusanyikia kabla ya kuanza maandamano. Hivyo basi, wapi maandamano yataanzia, umbali wa kilomita ngapi, kwa kupita barabara zipi na wapi yataishia. Hayo yanaweza kufanyika kwa ustaarabu kabisa.

Jukumu la polisi litakuwa ni kuyaongoza na kuhakikisha hakuna vurugu zinazotoka miongoni mwa waandamanaji, na si kinyume chake. Kwanini kuwepo na hofu ya vurugu wakati wenye kuandamana ni wafuasi wa chama au kikundi kimoja cha kijamii kwa wakati mmoja, tena wakiwa na viongozi wao?

Katika nchi za wenzetu, polisi huwa na kazi ngumu na hata kufikia kuwaambia waandaaji wa maandamano kusitisha maandamano kama maandamano husika yatasababisha kuwepo na maandamano ya kupinga maandamano hayo katika wakati mmoja kutoka kwa kundi lingine. Sisi hatujafikia huko. Kwa mfano, Dar wafuasi wa CUF wakiandamana kwa amani, wafuasi wa CCM huwaoni kufanya maandamano ya kuwapinga CUF kwa wakati huo huo, na kinyume chake.

Dunia imebadilika, tunahitaji kubadilika pia. Jeshi letu la polisi lijipange upya. Kwa jinsi picha za televisheni zinavyoonyesha polisi wetu wanavyowapiga virungu na hata kuwarushia risasi waandamanaji wasio na silaha inaamsha hisia mbaya kwa Watanzania. Inaleta taswira mbaya ya nchi yetu kwa jumuiya ya kimataifa. Inasikitisha sana. Ni aibu kwa nchi yetu tuliyozaliwa na tunayoipenda sana. Tubadilike.

Maggid Mjengwa

Iringa