PRICA MAHENGE AONGOZA KITAIFA MTIHANI WA DARASA LA SABA

Prisca Mahenge

------- 

NILIPOPATA taarifa kwa mara ya pili ya kuwa Shule ya Msingi ya Alliance (English Medium) imeongoza, tena kwa kishindo katika mtihani wa kuhitimu elimu ya msingi mwaka huu, nilijawa shauku ya kwenda kuitembelea.

Kilichonivutia zaidi hadi kwenda shuleni hapo ni taarifa ya kuwa wanafunzi saba walioongoza ni wasichana. Mshindi wa jumla katika mtihani huo aliyeshika nafasi ya kwanza pia ni msichana, Prisca Mahenge mwenye umri wa miaka 12.

“Namshukuru Mwenyezi Mungu kwa kuniwezesha kupata ushindi huu, nawashukuru wazazi na walimu wangu ambao kwa kipindi chote nilichokuwa hapa wamenipa ushirikiano wa hali ya juu. Matarajio yangu ni kusoma niwe daktari ili niweze kuwasaidia wananchi wenzangu kwa siku za baadaye,” anasema Prisca.

Kwa hakika, mtoto huyo alionekana kuwa mwenye furaha na aliachia tabasamu la hali ya juu, baada ya kukutana naye shuleni akiwa ameongozana na kaka yake, Levis Mahenge. Prisca ni miongoni mwa washindi 10 bora wa mtihani wa darasa la saba kwa kiwango cha ufaulu cha zaidi ya asilimia 80.

Alipata wastani wa alama 234, kwa kupata ushindi wa alama za daraja ‘A’ kwa masomo yote manne ya Hisabati, Maarifa ya Jamii, Lugha na Sayansi. Alliance English Medium Primary School iko nje ya mji katika eneo la Mahina. Hapo ni umbali wa kilometa 15 kutoka Mwanza Mjini.Habari hii imeandikwa na Nashon Kennedy