Wajane kata ya msalala mbeya wadai kupokonywa mali zao wanapokataa kurithiwa

 Baadhi  ya wanahabari wanaoshiriki  katika warsha ya mtandao  wa kijinsia  Tanzania (TGNP)  wakiwa katika warsha  ya  siku  mbili  jijini  Mbeya

 Baadhi  ya waraghbishi  wa  ngazi  ya  jamii  kutoka kata ya Msalama wilaya ya  Mbeya  vijijini  wakiwa katika  warsha hiyo

 Mwezeshaji  wa  warsha  hiyo akiwaonyesha baadhi ya mambo yaliyoibuliwa na  waraghbishi  wa ngazi ya jamii wilaya ya  Mbeya  vijijini.

..............................................................................................

Na  MatukiodaimaBlog

WAKATI serikali  na  wanaharakati  mbali mbali   wakiendelea  kupiga  vita   mila potofu  za  kurithi  wajane ,baadhi  ya  wanawake  wa kata ya Mlalala  wilaya  ya  Mbeya  vijijini  mkoani  Mbeya  wameeleza  kusikitishwa na vitendo  vya baadhi ya  wajane  kuendelea  kunyanyasika  pale  wanapokataa kurithiwa .

Hayo  yameelezwa  leo  wa  waraghbishi  wa jamii katika  ngazi ya  kijiji  kutoka kata ya Mlalala  wakati  wakielezea  matokeo ya  tafiti  walizozifanya katika  vijiji  vya kata    hiyo .

Akizungumza  mbele  ya  washiriki  wa warsha ya  siku  mbili  ya  mtandao  wa  jinsia  Tanzania  (TGNP) inayoendelea  jijini  Mbeya  kwa  kushirikisha   wanahabari   wa  vyombo  mbali mbali  kutoka  mikoa  ya  Mbeya  na  Iringa ,mwakilishi  wa  waraghabishi  hao Bi  Huruma  Mahenge  alisema  kuwa hadi  sasa  tatizo  hilo  bado  ni  kubwa zaidi.

Kwani  alisema kuwa  baadhi ya  wanawake  wameendelea  kupoteza  mali  zao na  wakati mwingine  kunyanyasika zaidi  kutokana na mila  hiyo ya  wanamke  anapofiwa na mume  kulazimishwa na ndugu  upande  wa  mwanaume  kurithiwa na  mwanandugu  ambae  ameteuliwa na familia ya  upande wa mume.

"Wajane  wamekuwa wakipokonywa mahali mbali mbali  zikiwemo  nyumba , mashamba na  vitu  mbali mbali vya  thamani ama  wakati mwingine  kufukuzwa kabisa  na  watoto iwapo ataonyesha kupingana na maamuzi ya  wanafamilia hao  ya  kurithiwa "alisema  Bi Mahenge

Kuwa  kupitia  kikundi  cha  cha  waraghbishi  wa jamii waliowezeshwa na TGNP  wameanza kupita  katika maeneo  mbali mbali ya  wilaya ya  Mbeya   vijijini  na  kutoa  elimu kupitia matamasha mbali mbali   kama  njia ya  kuelimisha jamii  kuepuka  mila  hizo  potofu.

Alisema hata  kasi ya  maambukizi ya  VVU katika wilaya  hiyo ya  Mbeya  vijijini na mkoa  wa Mbeya kwa  sehemu  yamekuwa yakichangiwa na mila   hizo  za kurithi  wajane.

 Bi Mahenge  mbali  ya  kuipongeza taasisi ya  TGNP kwa kuendelea  kutoa mafunzo  kwa jamii  na  kuijengea  jamii uelewa  kuhusu harakati  za ukombozi wa  mwanamke   kimapinduzi  katika muthadha  wa mjadala  wa madai  ya wanawake katika uchaguzi mkuu 2015  hivi  sasa wanawake ,watoto na  wazee  wameanza kufikiwa na elimu  hiyo kiasi  cha jamii kuanza kuachana na mambo kandamizi  dhidi ya  makundi hayo.

 

Katika  hatua  nyingine  Bi Mahenge  alisema  kuwa mbali ya serikali kupitia  wizara ya afya na ustawi wa jamii  sera  yake  kutaka wazee wenye  miaka kuanzia  miaka 60  kupatiwa  huduma  za  bure  za matibabu  ila kwa kata  hiyo bado  wazee  wameendelea  kukosa huduma   hiyo ya bure na badala  yake  wanapofika katika maeneo ya  huduma  za afya  husumbuliwa zaidi ama kuandikiwa  dawa za kwenda  kununua.

Kwa  upande  wake afisa mawasiliano wa  TGNP Bw  Melkizedeck Karol   alisema  kuwa lengo la  mtandao  huu  kutoa  elimu  kwa  wanahabari ni kutaka  kuendelea  kutoa elimu kwa  jamii na kwa pamoja  kuweza  kupaza  sauti  yenye kuleta mabadiliko kwa  jamii  dhidi ya vitendo  vya unyanyasaji wa  kijinsia.

Bw  Karol  alisema  kuwa  kwa  mwaka  huu TGNP inatoa mafunzo kama  hayo  kwa  wanahabari kutoka kanda  mbali mbali  na  kutaja  maeneo  ambayo  mafunzo kama  hayo  yanaendelea kuwa ni pamoja na Kishapu, Tarime, Morogoro  na Mbeya .